Het verhaal van oud-Oirlonaar Bert Arts in het Oirlose dialect. Uit het boekje van een bescheiden man..
Wat ik nou goij beschrieve, dat zal d’r nie op veul platse gebeure. Al dat d’r wel is minse ovverreije werre dur ennen auto of vermoord of verdrinke. As zoeiets in de krant stot dan laesde der efkus ovverhin en dor stodde nie beij stil. Mar as dat beij ow thuus gebeurd, dan is dat gans wat anders. Dus ovver verdrinke dor got dit schrieve ovver.
Os Lies, die is enne kier haost verdronke ien ennen teil vol water. Den haaj moêder buute beij de echterdeur klaor gezet, um wat klierrage uut te wasse. En os Lies zo’n matje toendertied van omgevear drie jaor ald was dor buute ok. Moêder wier weggeroepe umdat d’n enne an de vurdeur was. En dat duurde langer as ze haaj gedocht. En toen ze wer terug ging naor d’n teil schrok ze zich en huudje. Ze begon opens hiel hard te roepe: “Bert kom toch is gauw want Lies is an ’t verdrinke”. Ik heb ze mit moêder dur direct uutgehald, want ze was al kopke onder. Ik zei “zeuj ze doeëd zien?” Mar beij moêder kwaam ’t dokters instinkt wer baove en ze zet “rol ze gauw ovver de betone vloer beij Joeste op de stal (den was dor vlak beij) dan lopt ut water wel ut eure moond”. Dus ik as de werlicht an ’t rolle. Nouweliks hak en paar maeter gerold of dor begon al water uut de moond te loepe. Ze begon te hoeste en daornao te schrawwe. Moeder zaag dit alles gebeure en riep half beukend “Goddank ze leaft nog”. Ze viet ze gauw an en rende zoe hard as ze kon mit eur kiend nor binne. Ze het ze mit enne werme kroek ien bed gestopt. En daags daornao was ze al hiel wat opgeknapt. En geluk beij en ongeluk zun we mar zegge. Mar as moêder iets latter was gekomme, haaj Lies nie mer gelefd. Zoe haaj ik zonder ’t te wiete en heldendaod verricht. En dat is hiel wat anders as kattekwaod uut haale.
Mar noeit het d’r ien Peel en Maas toendertied gestaon: “Een jongetje redt zijn zusje van drie jaar van de verdrinkingsdood”. Mar ja, dat zal wel hiel gewoen zien in den tied. Mar ge begriept wel dat ik d’n held was beij os thuus. Dus kos ik d’n eursten tied beij eur en potje braeke. Ik was zoegezeet ennen held zonder onderscheiding, zak mar zegge.
Geef een reactie